رحیم یار خان کے علاقے عباسیہ میں ایک گھریلو تنازع افسوسناک انجام تک پہنچ گیا، جہاں مبینہ طور پر داماد کی گاڑی کی ٹکر سے اس کا سسر جان کی بازی ہار گیا۔ پولیس کے مطابق متوفی کی بیٹی ناراضی کے باعث اپنے والدین کے گھر مقیم تھی، جس پر داماد اپنی والدہ کے ہمراہ معاملات طے کرنے کے لیے سسرال پہنچا۔
پولیس کا کہنا ہے کہ ملاقات کے دوران دونوں خاندانوں کے درمیان بحث و تکرار ہوگئی۔ بعد ازاں جب داماد وہاں سے روانہ ہونے لگا تو متوفی مبینہ طور پر گاڑی کے سامنے آ کھڑا ہوا۔
اسی دوران گاڑی کی ٹکر لگنے سے وہ شدید زخمی ہو گیا اور موقع پر ہی دم توڑ گیا۔ واقعے کے بعد ملزم جائے وقوعہ سے فرار ہو گیا، جبکہ پولیس نے مقدمہ درج کرکے مختلف پہلوؤں سے تحقیقات کا آغاز کر دیا ہے۔
