سعودی شہری دفاع نے مکہ مکرمہ میں ڈرون حملے کی کوشش ناکام بنائے جانے کے بعد شہر سے خطرہ ٹلنے کا اعلان کردیا۔ سعودی حکام کے مطابق مکہ مکرمہ، طائف اور جدہ کی گورنریوں میں پیشگی انتباہی سائرن بجائے گئے، جس کے بعد صورتحال معمول پر آنے کی اطلاع دی گئی۔
سعودی عرب کے زیرِ قیادت فوجی اتحاد کے ترجمان ترکی المالکی نے بتایا کہ سعودی فضائی دفاع نے منگل کے روز مکہ مکرمہ کے جنوب میں ایک ڈرون کو ممنوعہ فضائی حدود میں داخل ہونے سے پہلے روک کر تباہ کردیا۔ ان کے مطابق مکہ مکرمہ کو نشانہ بنانے کی یہ دوسری کوشش تھی، اس سے قبل 27 جولائی 2017 کو بیلسٹک میزائل کے ذریعے حملے کی کوشش کی گئی تھی۔ ترجمان نے کہا کہ ڈرون حملے کی کوشش لاکھوں مسلمانوں کے جذبات مشتعل کرنے کی سنگین کارروائی تھی، جبکہ اسلامی تعاون تنظیم نے مکہ اور مدینہ کے علاقوں پر حوثی حملوں کی شدید مذمت کی ہے۔
