مشہور امریکی ریپر میکل مور کو فلسطین کی حمایت میں نعرے لگانے کے بعد برطانوی گلوکار ایڈ شیرن کے امریکی ٹور سے الگ کردیا گیا۔ برطانوی خبررساں ایجنسی کے مطابق میکل مور نے بتایا کہ 4 ستمبر کو نیو جرسی کے میٹ لائف اسٹیڈیم میں ہونے والے کانسرٹ کے دوران انہوں نے فلسطین کی حمایت میں ’فلسطین کو آزاد کرو‘ کے نعرے لگائے، جس کے بعد انہیں دورے کے باقی کانسرٹس میں پرفارم نہ کرنے کا فیصلہ کیا گیا۔
میکل مور نے انسٹاگرام پر لکھا کہ گزشتہ ہفتے ان کے اور ایڈ شیرن کے درمیان کچھ مشکل بات چیت ہوئی تھی۔ میسینا ٹورنگ گروپ نے تصدیق کی کہ متعلقہ فریقین سے مشاورت کے بعد میکل مور کو باقی شوز سے الگ کرنے کا فیصلہ کیا گیا، تاہم ایڈ شیرن نے واضح کیا کہ یہ فیصلہ ان کا نہیں تھا۔ میکل مور طویل عرصے سے فلسطینیوں کی حمایت اور غزہ میں اسرائیلی کارروائیوں کے خلاف آواز اٹھاتے رہے ہیں۔
