خیبر پختونخوا حکومت نے پیٹرولیم مصنوعات کی سپلائی اور قیمتوں کی صورتحال کے پیشِ نظر صوبے بھر کے تمام سرکاری و نجی تعلیمی ادارے ہفتے میں دو دن بند رکھنے کا فیصلہ کیا ہے۔ محکمہ تعلیم کی جانب سے جاری نوٹیفکیشن کے مطابق پرائمری و سیکنڈری اسکولوں، کالجوں اور یونیورسٹیوں میں ہر ہفتے جمعہ اور ہفتے کو چھٹی ہوگی، جبکہ باقی چار ایام میں تدریسی سرگرمیاں معمول کے مطابق جاری رہیں گی۔
حکومت کے مطابق اس اقدام کا مقصد ایندھن کی بچت اور طلبہ، اساتذہ و والدین کو ٹرانسپورٹ کے مسائل سے ریلیف فراہم کرنا ہے۔ تعلیمی حرج سے بچنے کے لیے اسکولوں کے سربراہان کو ہوم اسکولنگ اور آن لائن تدریس جاری رکھنے، جبکہ ہائر ایجوکیشن کے اداروں کو ہائبرڈ ماڈل اپنانے کی ہدایت کی گئی ہے۔ نوٹیفکیشن کے مطابق فیصلہ عارضی نوعیت کا ہے اور پیٹرولیم مصنوعات کی صورتحال بہتر ہونے یا نئے حکومتی احکامات کی صورت میں شیڈول میں تبدیلی کی جاسکتی ہے۔
