کراچی میں حکومت سندھ نے ٹرانسپورٹرز کو سہولیات کی فراہمی کے لیے نیو سبزی منڈی میں خصوصی ون ونڈو فیسلیٹیشن ڈیسک قائم کرنے کا فیصلہ کیا ہے۔ محکمہ ٹرانسپورٹ و ماس ٹرانزٹ کے اجلاس سے خطاب کرتے ہوئے صوبائی وزیر ٹرانسپورٹ شرجیل انعام میمن نے بتایا کہ اس ڈیسک کے ذریعے کراچی آنے والی مال بردار گاڑیوں کو روٹ پرمٹ، فٹنس سرٹیفکیٹس اور دیگر ضروری دستاویزات کے اجرا اور تجدید کی سہولت ایک ہی مقام پر فراہم کی جائے گی۔
انہوں نے کہا کہ اس اقدام کا مقصد 30 جون 2026 تک زیادہ سے زیادہ کمرشل اور مال بردار گاڑیوں کو سندھ حکومت کے ڈیجیٹل اور خودکار نظام کا حصہ بنانا ہے، تاکہ قانونی تقاضوں کی تکمیل کے ساتھ ٹرانسپورٹرز کو بروقت اور آسان خدمات میسر آ سکیں۔
شرجیل انعام میمن کے مطابق فیسلیٹیشن ڈیسک آئندہ ہفتے سے مکمل طور پر فعال ہو جائے گا، جس کے لیے عملے کی تعیناتی اور ٹرانسپورٹرز میں آگاہی پیدا کرنے کے لیے بینرز اور عوامی نوٹسز کا اجرا بھی کیا جا رہا ہے۔ انہوں نے مزید کہا کہ حکومت سندھ ٹرانسپورٹ کے شعبے میں مکمل ڈیجیٹائزیشن کے وژن پر تیزی سے عمل کر رہی ہے، جبکہ اس اقدام سے ٹرانسپورٹرز کو مختلف دفاتر کے چکر لگانے سے نجات ملے گی اور وقت و اخراجات میں بھی نمایاں کمی آئے گی۔
