عراق کی قومی فٹبال ٹیم کے مڈفیلڈر زیڈان اقبال فیفا ورلڈ کپ 2026 میں شرکت کے ساتھ ایک منفرد اعزاز اپنے نام کرنے جا رہے ہیں۔ وہ ورلڈ کپ میں کھیلنے والے پہلے پاکستانی نژاد فٹبالر ہوں گے، جس پر دنیا بھر میں موجود پاکستانی کمیونٹی خوشی اور فخر کا اظہار کر رہی ہے۔
23 سالہ زیڈان اقبال انگلینڈ کے شہر مانچسٹر میں پیدا ہوئے۔ ان کی والدہ کا تعلق عراق جبکہ والد پاکستانی نژاد ہیں۔ زیڈان نے اپنے فٹبال کیریئر کا آغاز مقامی سطح سے کیا اور بعد ازاں مانچسٹر یونائیٹڈ کی معروف اکیڈمی کا حصہ بنے۔
سال 2021 میں وہ مانچسٹر یونائیٹڈ کی پہلی ٹیم کے لیے میدان میں اترنے والے پہلے برطانوی جنوبی ایشیائی کھلاڑی بنے تھے۔ ایک حالیہ انٹرویو میں زیڈان نے کہا کہ انہیں یہ جان کر حیرت ہوئی کہ وہ ورلڈ کپ میں شرکت کرنے والے پہلے پاکستانی نژاد فٹبالر ہوں گے۔ ان کے مطابق بچپن میں ان کی توجہ صرف فٹبال کھیلنے اور اس سے لطف اندوز ہونے پر تھی، تاریخ رقم کرنے پر نہیں۔
زیڈان اقبال نے بتایا کہ ان کے والد ان کی کامیابیوں پر فخر کرتے ہیں اور عراق کی نمائندگی کے فیصلے کی حمایت کرتے ہیں، تاہم اگر وہ پاکستان کی جانب سے کھیلتے تو شاید ان کی خوشی مزید بڑھ جاتی۔ ورلڈ کپ 2026 میں ان کی شرکت پاکستانی نژاد فٹبال شائقین کے لیے ایک یادگار لمحہ ثابت ہوگی۔
