کراچی کے جناح انٹرنیشنل ایئرپورٹ پر ایف آئی اے امیگریشن نے مبینہ جعلی اور مشکوک این او سی کے ذریعے کویت سفر کرنے کی کوشش کرنے والے ایک سرکاری ملازم کو آف لوڈ کر دیا۔ ترجمان ایف آئی اے کے مطابق مسافر کی شناخت سریش سوامی کے نام سے ہوئی، جو پاکستانی پاسپورٹ اور کویت کے وزٹ ویزے پر سفر کر رہا تھا۔ امیگریشن کلیئرنس کے دوران اس نے خود کو ملٹری اکاؤنٹنٹ جنرل پاکستان میں تعینات جونیئر آڈیٹر ظاہر کرتے ہوئے بیرون ملک سفر کے لیے ادارے کی جانب سے جاری کردہ این او سی پیش کیا۔
ترجمان کے مطابق دستاویزات کی تفصیلی جانچ کے دوران پیش کیا گیا این او سی مشکوک پایا گیا اور اس کی تفصیلات سے اس کے جعلی ہونے کا شبہ ظاہر ہوا۔ ابتدائی تفتیش میں مسافر نے بتایا کہ مذکورہ این او سی اسے کراچی کے رہائشی اپنے دوست رئیس گل نے فراہم کیا تھا۔ مزید تحقیقات سے یہ بھی معلوم ہوا کہ بطور سرکاری ملازم بیرون ملک سفر اور پاسپورٹ کے حصول کے لیے متعلقہ ادارے کی اجازت ضروری تھی، تاہم مسافر اس حوالے سے کوئی قابلِ قبول ثبوت پیش نہ کر سکا۔
ایف آئی اے کے مطابق مشکوک این او سی، اس کے حصول کے طریقہ کار اور سرکاری ضوابط کی بظاہر خلاف ورزی کے پیش نظر مسافر کو آف لوڈ کر دیا گیا ہے، جبکہ مزید تصدیق اور قانونی کارروائی کے لیے معاملہ ایف آئی اے اینٹی ہیومن ٹریفکنگ سرکل کراچی کے حوالے کر دیا گیا ہے۔
