واشنگٹن: سعودی وزیر دفاع شہزادہ خالد بن سلمان نے ہنگامی دورۂ امریکا کے دوران امریکی صدر ڈونلڈ ٹرمپ اور نائب صدر جے ڈی وینس سے اہم ملاقاتیں کیں، جن میں مشرقِ وسطیٰ کی سیکیورٹی صورتحال، ایران سے متعلق معاملات اور خطے میں کشیدگی پر تبادلہ خیال کیا گیا۔
امریکی نیوز ایجنسی کے مطابق شہزادہ خالد بن سلمان نے ملاقاتوں کے دوران سعودی ولی عہد شہزادہ محمد بن سلمان کا خصوصی پیغام بھی امریکی قیادت تک پہنچایا۔
ذرائع کے مطابق نائب صدر جے ڈی وینس سے گفتگو میں سعودی وزیر دفاع نے کہا کہ سعودی عرب خطے میں ایران کے ساتھ کشیدگی کم کرنے کا خواہاں ہے، تاہم ایران نواز عراقی ملیشیاؤں کی جانب سے سعودی بنیادی ڈھانچے اور توانائی کی تنصیبات پر حملوں نے سرخ لکیر عبور کی، جس کے بعد سعودی عرب کو جواب دینا پڑا۔
