کراچی کے علاقے سرجانی ٹاؤن کے سیفل مری گوٹھ میں مبینہ طور پر موٹر سائیکل کی ڈیمانڈ پوری نہ ہونے پر سسرالیوں کے تشدد سے ایک خاتون جاں بحق ہو گئی۔ ریسکیو حکام کے مطابق متوفیہ کی شناخت 18 سالہ مصباح کے نام سے ہوئی ہے۔
اہلخانہ کا الزام ہے کہ مصباح کو سسرالی افراد کی جانب سے موٹر سائیکل کا مطالبہ پورا نہ ہونے پر مسلسل تشدد کا نشانہ بنایا جاتا رہا۔ ان کا کہنا ہے کہ واقعے سے قبل مقتولہ نے اپنے بھائی کو بھی تشدد اور مطالبات سے متعلق آگاہ کیا تھا۔
خاندان کے مطابق اس سے پہلے بھی تشدد کے واقعات پیش آ چکے تھے، تاہم شکایات کے باوجود پولیس کی جانب سے مؤثر کارروائی نہیں کی گئی۔ متاثرہ اہلخانہ نے واقعے میں ملوث افراد کی فوری گرفتاری اور انصاف کی فراہمی کا مطالبہ کیا ہے۔
دوسری جانب پولیس نے مقدمے کی تحقیقات شروع کرتے ہوئے مختلف پہلوؤں سے شواہد اکٹھے کرنے کا عمل جاری رکھا ہوا ہے۔
