افغانستان کی کرکٹ ٹیم کے کپتان راشد خان اپنے مرحوم بڑے بھائی کی دعائے مغفرت میں شریک ہونے کے لئے افغانستان پہنچ گئے۔
رپورٹس کے مطابق متحدہ عرب امارات میں جاری ایشیا کپ میں شریک افغان ٹیم کے کپتان راشد خان نے افغانستان کے صوبے ننگر ہار میں اپنے آبائی علاقے میں پہنچ کر اپنے بڑے بھائی حاجی عبدالحلیم شنواری مرحوم کے لیے مقامی مسجد میں ہونے والی فاتحہ خوانی میں شرکت کی۔
افغانی کپتان راشد خان کے بھائی کے لئے آج کابل میں دعائے مغفرت کی جائے گی۔
افغانی کپتان طویل علالت کے بعد انتقال کر جانے والے بڑے بھائی کی نماز جنازہ میں شریک نہیں ہو سکے تھے۔ پشاور میں مقیم راشد خان کے بڑے بھائی فالج کا شکار تھے۔
افغانی کپتان ایشیا کپ میں اپنے پہلے میچ میں ہانگ کانگ کے خلاف 94 رنز سے کامیابی پانے والی افغان کرکٹ ٹیم کی قیادت کے بعد کابل پہنچے تھے۔ وہ ایشیا کپ میں 16 ستمبر کو میزبان یو اے ای کے خلاف دوسرے میچ میں قیادت کے لیے واپس دبئی روانہ ہوں گے۔
واضح رہے کہ پاکستان کرکٹ ٹیم کے کھلاڑیوں نے پاکستان، افغانستان اور یو اے ای کی ٹیموں کے درمیان منعقدہ سہ فریقی سیریز کے پہلے میچ کے بعد افغانستان کے ڈریسنگ روم پہنچ کر راشد خان سے ان کے بڑے بھائی کی رحلت پر اظہار تعزیت کیا تھا۔
