اسلام آباد: چیئرمین پاکستان پیپلز پارٹی بلاول بھٹو زرداری نے کہا ہے کہ پاکستان جنگ نہیں چاہتا، تاہم اپنے بنیادی قومی مفادات کے تحفظ پر کسی قسم کا سمجھوتہ نہیں کرے گا۔ انہوں نے کہا کہ سندھ طاس معاہدے کی بحالی کے بغیر پاکستان اور بھارت کے درمیان پائیدار امن ممکن نہیں، جبکہ پانی کو بطور ہتھیار استعمال کرنا عالمی امن اور استحکام کے لیے سنگین خطرہ ہے۔
اسلام آباد میں سندھ طاس معاہدے سے متعلق سیمینار سے خطاب کرتے ہوئے بلاول بھٹو نے کہا کہ پانی صرف جغرافیہ کا نہیں بلکہ خوراک، مستقبل اور انسانی زندگی کا مسئلہ ہے۔ انہوں نے کہا کہ آبنائے ہرمز کی بندش کے اثرات نے ثابت کر دیا کہ اہم آبی گزرگاہوں کی اہمیت عالمی معیشت سے براہِ راست جڑی ہوئی ہے۔
انہوں نے مزید کہا کہ دریائے سندھ پاکستان کی زندگی کی ضمانت ہے اور عالمی برادری کو مشترکہ آبی وسائل کو سیاسی یا جنگی ہتھیار بننے سے روکنے کے لیے مؤثر بین الاقوامی قوانین وضع کرنے چاہییں۔ بلاول بھٹو نے خبردار کیا کہ اگر بروقت اقدامات نہ کیے گئے تو مستقبل میں دریا، نہریں اور دیگر آبی گزرگاہیں عالمی تنازعات کا مرکز بن سکتی ہیں۔
