غزہ: غزہ اور مقبوضہ مغربی کنارے میں اسرائیلی فوج کی کارروائیاں جاری ہیں، جن میں بچوں اور خواتین سمیت متعدد فلسطینی جان کی بازی ہار گئے۔ عرب میڈیا کے مطابق غزہ کے علاقے المواسی میں قائم بے گھر افراد کے خیموں پر فضائی حملے میں ایک سالہ شیر خوار بچے، 23 سالہ خاتون سمیت 6 فلسطینی شہید جبکہ درجنوں افراد زخمی ہوگئے۔ دیرالبلاح میں بھی ایک اور حملے میں ایک بچے سمیت 3 افراد جاں بحق ہوئے۔
دوسری جانب مقبوضہ مغربی کنارے کے علاقوں راملہ اور البیرہ میں اسرائیلی فورسز کی کارروائیوں کے دوران دو 15 سالہ فلسطینی نوجوان بھی شہید ہوگئے۔ ادھر ترک صدر رجب طیب اردوان نے کہا ہے کہ مسئلہ فلسطین کے منصفانہ حل اور اسرائیلی قبضے کے خاتمے کے بغیر مشرقِ وسطیٰ میں پائیدار امن ممکن نہیں، جبکہ عالمی برادری کو اس بحران کے حل کے لیے مؤثر کردار ادا کرنا چاہیے۔
