کراچی: محکمہ موسمیات نے جولائی کے پہلے ہفتے میں ملک کے بیشتر علاقوں میں مون سون بارشوں کی پیشگوئی کرتے ہوئے بتایا ہے کہ آج شام یا رات سے مغربی ہواؤں کا نیا سلسلہ ملک میں داخل ہوگا، جبکہ بحیرہ عرب سے آنے والی مرطوب ہوائیں بھی مختلف علاقوں کو متاثر کریں گی۔
یکم سے 6 جولائی کے دوران پنجاب، خیبرپختونخوا، کشمیر، گلگت بلتستان اور سندھ کے مختلف اضلاع میں گرج چمک کے ساتھ بارش کا امکان ہے، جبکہ 3 اور 4 جولائی کو سکھر، جیکب آباد اور لاڑکانہ میں بھی ہلکی بارش متوقع ہے۔
محکمہ موسمیات کے مطابق کراچی میں 13 جولائی تک بارش کا کوئی واضح امکان نہیں، تاہم آئندہ تین روز کے دوران موسم مرطوب اور مطلع جزوی ابر آلود رہے گا، جبکہ بعض علاقوں میں ہلکی بوندا باندی ہو سکتی ہے۔ شہر میں اس دوران 30 سے 40 کلومیٹر فی گھنٹہ کی رفتار سے تیز ہوائیں چلنے کا بھی امکان ظاہر کیا گیا ہے۔
