حکومت اور اپوزیشن کے درمیان مذاکرات کا پہلا دور مکمل ہوگیا، جس کے بعد باقاعدہ اعلامیہ بھی جاری کردیا گیا ہے۔
اعلامیے کے مطابق ملاقات میں دونوں فریقوں نے ایک دوسرے کو اپنے مؤقف سے آگاہ کیا اور ملک کی سیاسی صورتحال سمیت مختلف معاملات پر تفصیلی اور تحمل کے ساتھ گفتگو کی۔
مذاکرات کا دوسرا دور کل دن 2 بجے اسپیکر چیمبر میں ہوگا۔ مسلم لیگ ن اور پیپلز پارٹی کے ارکان نے قومی مسائل مذاکرات کے ذریعے حل کرنے پر زور دیا، جبکہ اسپیکر قومی اسمبلی سردار ایاز صادق نے مذاکراتی عمل میں کلیدی کردار ادا کیا۔
حکومتی وفد میں رانا ثنا اللہ، محسن نقوی، امیر مقام، طلال چوہدری، طارق فضل چوہدری اور شیری رحمان سمیت دیگر رہنما شریک ہوئے۔ اپوزیشن کی جانب سے بیرسٹر گوہر، راجا ناصر عباس، عامر ڈوگر، اسد قیصر، سلمان اکرم راجا اور حلیم عادل شیخ نے مذاکرات میں شرکت کی۔
