اسلام آباد: چیئرمین پی ٹی آئی بیرسٹر گوہر نے کہا ہے کہ وفاق کی جانب سے خیبرپختونخوا میں ایمرجنسی یا گورنر راج نافذ کیا گیا تو ان کی جماعت ہر ممکن آئینی و سیاسی آپشن استعمال کرے گی۔
اپنے بیان میں بیرسٹر گوہر نے کہا کہ گورنر راج یا ایمرجنسی سے حالات مزید خراب ہوں گے اور پی ٹی آئی اس اقدام کی مذمت کرے گی۔ ان کے مطابق ممکنہ لانگ مارچ پرامن ہوگا، جبکہ گورنر راج کی صورت میں قومی اسمبلی سے استعفوں کا فیصلہ ابھی نہیں کیا گیا۔
انہوں نے کہا کہ مضبوط وفاق کے لیے صوبوں کا خودمختار ہونا ضروری ہے۔
دوسری جانب سینیٹ میں اپوزیشن لیڈر علامہ راجہ ناصر عباس نے حکومت سے مذاکرات کا مطالبہ کرتے ہوئے کہا کہ خیبرپختونخوا میں گورنر راج کے لیے دہشت گردی کو جواز بنایا جا رہا ہے، تو بلوچستان میں دہشت گردی کے باوجود وہاں گورنر راج کیوں نافذ نہیں کیا جا رہا؟
