پاکستان اور برطانیہ نے معاشی اصلاحات، سرمایہ کاری اور نجی شعبے کے فروغ کے لیے تعاون جاری رکھنے پر اتفاق کیا ہے۔
وفاقی وزیر خزانہ محمد اورنگزیب سے برطانوی ہائی کمشنر جین میریٹ نے ملاقات کی، جس میں برطانیہ کی جانب سے پاکستان کی معاشی اصلاحات کے لیے تکنیکی معاونت جاری رکھنے پر اتفاق کیا گیا۔
محمد اورنگزیب نے کہا کہ پاکستان معاشی استحکام سے پائیدار ترقی کی جانب بڑھ رہا ہے، جبکہ حکومت کی توجہ پیداوار، سرمایہ کاری، برآمدات اور روزگار میں اضافے پر مرکوز ہے۔ انہوں نے کہا کہ میکرو اکنامک استحکام برقرار رکھنا حکومت کی اہم ترجیح ہے۔
ملاقات میں ساختی اصلاحات، کاروباری ماحول کی بہتری اور امداد سے تجارت کی جانب منتقلی پر بھی تبادلہ خیال کیا گیا۔ برطانوی کمپنیوں اور پاکستانی ڈائسپورا کے ذریعے کاروباری روابط بڑھانے کے ساتھ ایوی ایشن سیکٹر میں سرمایہ کاری اور فنانسنگ کے مواقع بھی زیرِ غور آئے۔
برطانوی ہائی کمشنر نے پاکستان کے تین ارب ڈالر کے یورو بانڈ کے اجرا کو سراہا، جبکہ برطانیہ نے پاکستان میں نجی شعبے کی ترقی کے لیے تعاون میں دلچسپی کا اظہار کیا۔
