سان فرانسسکو: یوٹیوب نے اپنی مختصر ویڈیوز کی سروس شارٹس کے لیے متعدد نئے فیچرز اور اپ ڈیٹس متعارف کرانے کا اعلان کیا ہے، جن کا مقصد صارفین کے دیکھنے کے تجربے کو مزید بہتر بنانا ہے۔ کمپنی کے مطابق شارٹس کے انٹرفیس میں تبدیلیوں کے ساتھ کئی نئے سہولتی اختیارات بھی شامل کیے جا رہے ہیں۔
نئی اپ ڈیٹ کے تحت صاف اسکرین کا فیچر متعارف کرایا جا رہا ہے، جس کے ذریعے ویڈیو دیکھتے وقت اسکرین پر موجود آئیکونز اور تحریر عارضی طور پر غائب ہو جائیں گے تاکہ صارف بغیر کسی رکاوٹ کے ویڈیو دیکھ سکے۔ اس کے علاوہ اب صارفین شارٹس ویڈیوز کو دوگنی رفتار سے بھی چلا سکیں گے۔
یوٹیوب نے لائیک کے لیے دل کے نشان کو متعارف کرانے کا اعلان کیا ہے، جبکہ ناپسند کے بٹن کی جگہ دلچسپی نہیں اور اس چینل کی ویڈیوز تجویز نہ کریں جیسے اختیارات شامل کیے جا رہے ہیں۔ کمپنی کا کہنا ہے کہ ناپسند کا بٹن اکثر غیر منصفانہ انداز میں استعمال کیا جاتا تھا، جبکہ نئے فیچرز صارفین کو اپنی پسند کے مطابق مواد دیکھنے پر زیادہ کنٹرول فراہم کریں گے۔
