اسلام آباد: وفاقی وزیر برائے پارلیمانی امور طارق فضل چوہدری نے کہا ہے کہ بانی پی ٹی آئی عمران خان کی صحت کی ذمہ داری حکومت کی تھی، ہے اور رہے گی۔ میڈیا سے گفتگو میں ان کا کہنا تھا کہ حکومت نے پی ٹی آئی کی اپیل کے بغیر بھی عمران خان کو بہترین طبی سہولیات فراہم کیں اور سپریم کورٹ کے فیصلے پر من و عن عملدرآمد کیا جائے گا۔
طارق فضل چوہدری نے کہا کہ پاکستان میں عدلیہ آزاد ہے اور میرٹ پر فیصلے کررہی ہے، عدالتوں کے فیصلوں سے ہی رہائی کا راستہ بنتا ہے۔ ان کے مطابق وزیراعظم کے پاس ایسا کوئی انتظامی اختیار نہیں کہ وہ عدالت کے فیصلے کے برعکس کوئی قدم اٹھائیں۔
انہوں نے بتایا کہ وزیراعظم ایک دو روز میں اپوزیشن لیڈر کے خط کا جواب دیں گے، جس کے بعد مشترکہ ملاقات کے لیے جگہ کا تعین کیا جائے گا۔
