کراچی: میئر کراچی مرتضیٰ وہاب نے کہا ہے کہ کے ایم سی اس وقت شہر کی کسی بھی سڑک پر پارکنگ فیس وصول نہیں کر رہی، لہٰذا اگر کوئی شخص کے ایم سی کے نام پر پارکنگ فیس طلب کرے تو شہری فوری طور پر اس کی اطلاع متعلقہ حکام کو دیں۔
میڈیا سے گفتگو کرتے ہوئے مرتضیٰ وہاب نے شہریوں سے اپیل کی کہ پارکنگ فیس کے معاملے میں اگر کوئی انہیں “ماموں” بنانے کی کوشش کرے تو وہ اس کا شکار نہ بنیں۔ انہوں نے دعویٰ کیا کہ بعض مقامات پر غیر قانونی طور پر پارکنگ فیس وصول کی جا رہی ہے اور اس حوالے سے شکایات متعلقہ اداروں تک پہنچائی جائیں۔
میئر کراچی نے سیاسی گفتگو کرتے ہوئے جماعت اسلامی پر بھی تنقید کی اور کہا کہ احتجاج کی سیاست کے بجائے عملی اقدامات پر توجہ دینی چاہیے۔ انہوں نے اس عزم کا اظہار بھی کیا کہ وہ عوام کے مسائل کے حل کے لیے بدستور میدان میں موجود رہیں گے۔
