کراچی: کراچی میں کمرشل عمارتوں میں آتشزدگی کی روک تھام اور ہنگامی صورتحال سے مؤثر انداز میں نمٹنے کے اقدامات کے سلسلے میں کمشنر کراچی سید حسن نقوی کی زیر صدارت اجلاس منعقد ہوا۔ اجلاس میں ڈپٹی کمشنرز، اسسٹنٹ کمشنرز، سندھ بلڈنگز کنٹرول اتھارٹی ، پی ڈی ایم اے، سول ڈیفنس اور دیگر متعلقہ اداروں کے نمائندوں نے شرکت کی۔
اجلاس کے دوران بریفنگ میں بتایا گیا کہ شہر بھر میں 800 سے زائد شاپنگ مالز اور کمرشل عمارتوں کا فائر سیفٹی آڈٹ سروے مکمل کر لیا گیا ہے۔ پی ڈی ایم اے حکام نے آگاہ کیا کہ سروے کے لیے خصوصی موبائل ایپ تیار کی جا چکی ہے، جبکہ تمام متعلقہ معلومات ڈیش بورڈ پر اپ لوڈ کر دی گئی ہیں تاکہ نگرانی اور پیش رفت کا مؤثر جائزہ لیا جا سکے۔
کمشنر کراچی سید حسن نقوی نے ہدایت کی کہ فائر سیفٹی آڈٹ سروے کمیٹیاں اپنی کارروائی مزید تیز کریں اور جن کمرشل عمارتوں کا سروے ابھی باقی ہے، اسے جلد از جلد مکمل کیا جائے تاکہ شہریوں کے جان و مال کے تحفظ کو یقینی بنایا جا سکے۔
