اسلام آباد: محکمہ موسمیات نے آج سے 6 جولائی تک ملک کے بیشتر علاقوں میں مون سون بارشوں کی پیشگوئی کرتے ہوئے شہریوں کو احتیاط برتنے کی ہدایت کی ہے۔
محکمہ موسمیات کے مطابق پنجاب، خیبرپختونخوا، سندھ، بلوچستان، کشمیر اور گلگت بلتستان میں بارش کا امکان ہے، جبکہ اسلام آباد، راولپنڈی، لاہور، گوجرانوالہ، سیالکوٹ، پشاور اور نوشہرہ کے نشیبی علاقوں میں اربن فلڈنگ کا خدشہ ظاہر کیا گیا ہے۔
بالائی علاقوں میں لینڈ سلائیڈنگ اور ندی نالوں میں طغیانی کا بھی امکان ہے، اس لیے شہریوں کو کمزور تعمیرات، بجلی کے کھمبوں اور بل بورڈز سے دور رہنے اور دوران سفر احتیاط کرنے کی ہدایت کی گئی ہے۔
