پاکستان نے انڈر 19 ایشیا کپ کے فائنل میں بھارت کو عبرتناک شکست دے کر نہ صرف گروپ میچ کی ہار کا بدلہ لے لیا بلکہ بھارتی ٹیم کا نام نہاد ’’ٹرافی ڈرامہ‘‘ بھی مکمل طور پر ناکام بنا دیا۔
فائنل کے مہمانِ خصوصی محسن نقوی تھے، جو ایشین کرکٹ کونسل کے چیئرمین بھی ہیں۔ انہوں نے فاتح پاکستانی ٹیم کو ٹرافی پیش کی۔ یاد رہے کہ محسن نقوی 28 ستمبر کو سینئر ایشیا کپ فائنل کے موقع پر بھی مہمانِ خصوصی تھے، تاہم اس وقت بھارتی سینئر کھلاڑیوں نے ان سے ٹرافی وصول کرنے سے انکار کر دیا تھا، جس کے باعث ٹرافی آج بھی ایشین کرکٹ کونسل کے دبئی ہیڈ کوارٹر میں موجود ہے۔
ذرائع کے مطابق اس بار بھی بھارتی جونیئر کھلاڑیوں نے پاکستانی ٹیم کے ساتھ دونوں میچوں میں ہینڈ شیک نہیں کیا اور ان کا منصوبہ تھا کہ وہ پاکستانی وزیر داخلہ اور پی سی بی چیئرمین سے ٹرافی وصول نہیں کریں گے۔ تاہم پاکستانی کرکٹرز نے میدان میں شاندار کارکردگی دکھاتے ہوئے بھارت کو بھاری شکست دے کر ان کے اس منصوبے کو خاک میں ملا دیا۔
واضح رہے کہ پاکستان نے فائنل میں بھارت کو 191 رنز کے بڑے مارجن سے شکست دے کر انڈر 19 ایشیا کپ کا ٹائٹل اپنے نام کیا۔ اس تاریخی فتح کو کرکٹ شائقین نے قومی کرکٹ کے روشن مستقبل کی علامت قرار دیا ہے۔
