صدرِ مملکت آصف علی زرداری نے دورۂ عراق کے دوران بغداد میں زیاراتِ مقدسہ پر حاضری دی اور امتِ مسلمہ کے امن، اتحاد اور سلامتی کے لیے خصوصی دعائیں کیں۔
ایوان صدر سے جاری بیان کے مطابق صدر مملکت نے بغداد میں حضرت شیخ عبدالقادر جیلانیؒ کے مزار پر فاتحہ خوانی کی۔ انہوں نے کاظمیہ مقدسہ میں امامِ موسیٰ الکاظمؑ اور امامِ محمد التقیٰ الجوادؑ کے روضوں پر بھی حاضری دی۔
صدرِ مملکت نے روضۂ کاظمیہ میں دعا کرتے ہوئے عالمِ اسلام میں امن، بھائی چارے اور یکجہتی کے فروغ کی دعا کی اور زائرین کی کتاب میں اپنے تاثرات بھی قلمبند کیے۔ انہوں نے آئمۂ اہلِ بیتؑ کی تعلیمات کو علم، صبر، حکمت اور اخلاقی قوت کا دائمی سرچشمہ قرار دیا۔
صدر آصف علی زرداری نے بغداد میں امام اعظم ابو حنیفہ کے مزار پر بھی حاضری دی اور دینی خدمات کو خراجِ عقیدت پیش کیا۔ اس موقع پر انہوں نے تمام مزارات کے منتظمین اور مبلغین سے ملاقاتیں بھی کیں اور ان کی خدمات کو سراہا۔
صدرِ مملکت کا کہنا تھا کہ اولیاء کرام اور آئمۂ دین کی تعلیمات آج بھی امتِ مسلمہ کے لیے مشعلِ راہ ہیں اور انہی اصولوں پر عمل پیرا ہو کر دنیا میں امن و رواداری کو فروغ دیا جا سکتا ہے۔
