جنوری کے پہلے ہفتے میں سری لنکا کے دورے کے لیے قومی ٹی ٹوئنٹی ٹیم کے اعلان کی تیاریاں آخری مراحل میں داخل ہو گئی ہیں اور ٹیم کا باضابطہ اعلان جلد متوقع ہے۔
پاکستان اور سری لنکا کے درمیان 7، 9 اور 11 جنوری کو دمبولا میں تین ٹی ٹوئنٹی میچز کھیلے جائیں گے، جن کے لیے سلیکشن کمیٹی نے ممکنہ کھلاڑیوں کے انتخاب پر مشاورت شروع کر رکھی ہے۔ دورے کے لیے نوجوان اور فارم میں موجود کھلاڑیوں کو مواقع دیے جانے کا قوی امکان ہے۔
فنٹس مسائل سے مکمل نجات کے بعد بگ بیش لیگ میں شاندار کارکردگی دکھانے والے شاداب خان کو سری لنکا کے خلاف سیریز میں شامل کیے جانے کا امکان ہے، جب کہ سلیکٹرز ان کی آل راؤنڈ صلاحیتوں سے بھرپور فائدہ اٹھانا چاہتے ہیں۔
دوسری جانب شاہین شاہ آفریدی، بابر اعظم، محمد رضوان، حارث رؤف اور حسن علی کو بگ بیش لیگ کے مکمل میچز کھیلنے کے لیے این او سی دیا گیا ہے۔ ان سینئر کھلاڑیوں کی عدم دستیابی کے باعث عبدالصمد، معاذ صداقت سمیت دیگر نوجوان پرفارمرز کے ناموں پر سنجیدگی سے غور کیا جا رہا ہے۔
واضح رہے کہ بھارت اور سری لنکا پہلے ہی ٹی ٹوئنٹی ورلڈ کپ کے لیے اپنی ٹیموں کا اعلان کر چکے ہیں، جب کہ شائقین کرکٹ کو پاکستانی اسکواڈ کے اعلان کا بے چینی سے انتظار ہے۔
