اسلام آباد: وزیر مملکت برائے خزانہ و محصولات بلال اظہر کیانی نے کہا ہے کہ رواں مالی سال کے دوران 35 لاکھ دکانداروں کو ٹیکس نیٹ میں شامل کیا جائے گا۔
قومی اسمبلی میں وفاقی بجٹ 2026-27 پر بحث میں حصہ لیتے ہوئے انہوں نے بتایا کہ حکومت بڑے پیمانے پر ٹیکس بیس کو وسیع کرنے کے لیے عملی اقدامات کر رہی ہے، جس کے تحت لاکھوں دکانداروں کو ٹیکس نیٹ کا حصہ بنایا جائے گا۔
وزیر مملکت کے مطابق رجسٹرڈ تاجروں کو فیڈرل بورڈ آف ریونیو (ایف بی آر) کی جانب سے سبز رنگ کی پلیٹ جاری کی جائے گی، جبکہ ان کا آڈٹ معمول کے حالات میں محدود رکھا جائے گا۔
انہوں نے کہا کہ اس اقدام کا مقصد ٹیکس نظام کو بہتر بنانا، دکانداروں کو رسمی معیشت میں شامل کرنا اور قومی معیشت کو مستحکم کرنا ہے۔
