کراچی کے علاقے شاہ لطیف ٹاؤن میں رینجرز نے کارروائی کرتے ہوئے فتنہ الخوارج سے تعلق رکھنے والے ایک انتہائی مطلوب دہشت گرد کو گرفتار کر لیا۔
ترجمان رینجرز کے مطابق گرفتار ملزم کا تعلق سوات سے ہے اور وہ 2007 میں فتنہ الخوارج کے گروپ میں شامل ہوا تھا۔ ملزم پر سنگین نوعیت کی دہشت گردی کی کارروائیوں میں ملوث ہونے کے الزامات ہیں۔
ترجمان نے بتایا کہ ملزم نے شکردرہ اور شکردیری کے علاقوں میں اسکولوں اور پولیس چوکی کو آئی ای ڈی حملوں کے ذریعے نشانہ بنایا۔ اس کے علاوہ وہ تھانہ مٹہ پر حملے، سرکاری اسلحہ لوٹنے اور تھانے کو آگ لگانے جیسے واقعات میں بھی ملوث رہا ہے۔
مزید بتایا گیا کہ ملزم 2008 میں سوات میں سیکیورٹی آپریشن کے دوران مینگورہ میں روپوش رہا اور بعد ازاں بیرون ملک فرار ہو گیا۔ وہ 2022 میں واپس پاکستان آ کر دوبارہ دہشت گردی کی کارروائیوں میں سرگرم ہو گیا تھا۔
ترجمان رینجرز کے مطابق گرفتار دہشت گرد جاوید علی خان عرف سواتی، سی ٹی ڈی سوات کو مطلوب تھا۔ ملزم کو مزید قانونی کارروائی کے لیے سی ٹی ڈی سوات کے حوالے کر دیا گیا ہے۔
