کراچی : سینئر صوبائی وزیر شرجیل میمن کا کہنا ہے کہ کراچی میں ریڈلائن بی آر ٹی منصوبہ مکمل ہونے میں مزید دو سال لگ سکتے ہیں۔
تفصیلات کے مطابق صوبائی وزیر اطلاعات و ٹرانسپورٹ شرجیل انعام میمن نے کہا ہے کہ ریڈ لائن بی آر ٹی منصوبے کی تکمیل میں مزید دو سال لگ سکتے ہیں تاہم اگلے چار سے پانچ ماہ میں عوام کی تکالیف میں نمایاں کمی لائی جائے گی۔
صوبائی وزیر اطلاعات و ٹرانسپورٹ شرجیل انعام میمن گفتگو کرتے ہوئے کہا کہ ہرمنصوبے میں مسائل آتے ہیں، ریڈ لائن منصوبے کے آغاز پر کیے گئے معاہدے کے بعد مہنگائی، ڈالر، اسٹیل اور سیمنٹ کے نرخ بڑھنے سے مشکلات پیدا ہوئیں۔
صوبائی وزیر کا کہنا تھا کہ شہر کے بیچ سے گیس، پانی اور بجلی کی لائنیں منتقل کرنا آسان نہیں، یہ ایک بڑا چیلنج ہے۔
انھوں نے کہا کہ کہ بی آر ٹی کی وجہ سے حکومت کو جو بدنامی کا سامنا ہے، اس میں سندھ حکومت کا قصور نہیں، نو ماہ نگراں حکومت نے اس منصوبے پر ایک اینٹ بھی نہیں لگائی، ہم روزانہ کی بنیاد پر اقدامات کررہے ہیں۔”
وزیر ٹرانسپورٹ نے مزید کہا کہ یونیورسٹی روڈ پر عوام کو جن مسائل کا سامنا ہے، وہ جنوری یا فروری تک حل ہوجائیں گے۔ ”
انھوں نے بتایا کہ ہم نے بی آر ٹی کے کنٹریکٹرز اور دیگر اداروں کو ایک ساتھ بٹھایا ہے اور کمشنر کراچی کو بھی روزانہ کی بنیاد پر رابطے میں رہنے کی ہدایت دی ہے۔
انہوں نے اعتراف کیا کہ منصوبے کی تاخیر سے عوام کو مشکلات ہیں، تاہم یقین دلایا کہ منصوبہ مکمل ہونے کے بعد شہری اسے انجوائے کریں گے۔ “ہم عوام سے معذرت خواہ ہیں لیکن ہر بڑے منصوبے میں مسائل آتے ہیں، ہم انہیں روزانہ کی بنیاد پر حل کررہے ہیں۔
سرکار کے پیسے بچانے کیلئے ہم ایک ایک چیز کو نیت نیتی سے دیکھ رہے ہیں، ریڈلائن بی آرٹی منصوبے کومکمل ہونے میں 2سال مزید لگ سکتے ہیں تاہم اگلے 4 سے 5 ماہ میں ریڈ لائن بی آرٹی سے متعلق عوام کی تکالیف دور کروں گا۔
