صدر ڈونلڈ ٹرمپ کا نوبل امن انعام نہ ملنے پر ردعمل

امریکی صدر ڈونلڈ ٹرمپ نے نوبل امن انعام نہ ملنے پر ردعمل دیتے ہوئے افسوس کا اظہار کیا ہے۔
امریکی صدر ڈونلڈ ٹرمپ نے وائٹ ہاؤس میں گفتگو میں کہا کہ نوبل امن انعام نہ ملنے پر افسوس ہے، لیکن خوش ہوں کہ میں لاکھوں زندگیاں بچائیں اور میں نے پاک بھارت سمیت سات جنگیں رکوائیں ہیں۔
صدر ڈونلڈ ٹرمپ کا کہنا تھا کہ خوشی ہے کہ میں نے لاکھوں زندگیاں بچائیں، میں نے پاک بھارت سمیت 7 جنگیں رکوائیں، پاک بھارت جنگ میں  7 طیارے گرائے گئے، پاکستان اور بھارت کو کہا اگر جنگ کی تو بھاری ٹیرف عائد کریں گے۔
امریکی صدر کا کہنا تھا کہ میں نوبل امن انعام دینے کے فیصلے کا احترام کرتا ہوں، نوبل امن انعام جیتنے والی ماریا کورینا ماچاڈو نے مجھے فون کیا، ماریا نے کہا میں یہ انعام آپ کے اعزاز میں قبول کررہی ہوں۔
امریکی صدر کا کہنا تھا کہ ماریا نے کہا نوبل امن انعام کے اصل حقدار آپ ہیں، میں نے یہ نہیں کہا کہ پھر انعام مجھے دے دو، لیکن شاید وہ دینا چاہتی تھیں۔
واضح رہے کہ وینزویلا میں جمہوریت کیلیے جدوجہد کرنے پر ماریہ کورینا نامی کارکن کو نوبل امن انعام دینے کا اعلان کیا گیا۔ کمیٹی کی جانب سے نوبل انعام کیلیے 338 نامزدگیوں پر غور کیا گیا جن میں صدر ٹرمپ بھی شامل تھے تاہم وہ محروم رہے۔
کمیٹی نے کہا کہ ماریہ کورینا نے وینزویلا میں جمہوریت کیلیے بھرپور کردار ادا کیا، جمہوریت اور آزادانہ انتخابات کیلیے صعوبتیں برداشت کیں، ان کو انعام 10 دسمبر کو دیا جائے گا۔
دنیا بھر میں امن، انسانی حقوق اور ہم آہنگی کے فروغ کیلیے دیا جانے والا نوبل امن انعام اپنی ایک سو چوبیس سالہ شاندار تاریخ کے ساتھ آج بھی امید کی علامت سمجھا جاتا ہے۔
یہ عالمی اعزاز سویڈن کے سائنس دان الفریڈ نوبیل کی وصیت کے مطابق قائم کیا گیا جنہوں نے اپنی دولت کا ایک حصہ اُن شخصیات یا اداروں کے نام کرنے کی ہدایت دی جو دنیا میں امن اور بھائی چارے کے قیام کے لیے نمایاں کردار ادا کریں۔