غزہ جنگ بندی کے فوراً بعد اسرائیل کا لبنان پر فضائی حملہ

غزہ میں جنگ بندی کے کچھ ہی دیر بعد اسرائیلی فوج  نے  لبنان میں حزب اللہ کے مبینہ انفرا اسٹرکچر  پر فضائی حملہ کر دیا۔
الجزیرہ کی رپورٹ کے مطابق جنوبی لبنان کے صیدا ضلع کے گاؤں الناجریہ میں اسرائیلی حملے میں کم از کم ایک شخص ہلاک اور دو دیگر زخمی ہوگئے ہیں۔
غیر ملکی خبر رساں ادارے کا کہنا ہے کہ حماس اور اسرائیل کے درمیان جنگ بندی شروع ہونے کے کچھ ہی دیر بعد اسرائیل نے لبنان کے جنوبی علاقے پر بمباری کی ہے۔
خبر رساں ادارے نے بتایا کہ حملے کی جگہ پر شعلوں کو بجھانے کے لیے بڑی تعداد میں فائر ٹرک روانہ ہو رہے ہیں، جبکہ ملحقہ المسیلہ روڈ کو وسیع نقصان کی وجہ سے بند کر دیا گیا ہے۔
اے ایف پی کی رپورٹ کے مطابق لبنانی صدر جوزف عون نے اسرائیل کی جانب سے رات کے وقت سویلین تنصیبات پر حملوں کی مذمت کی ہے، انہوں نے کہا کہ ایک بار پھر جنوبی لبنان بلا جواز اور بلا عذر اسرائیلی جارحیت کا نشانہ بنا ہے۔
یاد رہے کہ گزشتہ روز اسرائیلی فوج کی جانب سے غزہ جنگ بندی معاہدہ نافذ العمل ہونے کا اعلان کردیا گیا ہے، اسرائیلی فوج کا کہنا ہےکہ حماس کے 11قیدی رہا کیے جائیں گے۔
عرب میڈیا کے مطابق اسرائیل نے اپنے فوجیوں کو غزہ معاہدے کے تحت طے شدہ لائن سے پیچھے ہٹانا شروع کردیا ہے جبکہ غزہ کے لوگوں نے اپنے علاقوں کی جانب واپس جانے کا آغاز کر دیا ہے۔