پاکستان میں گوگل کروم بکس بنانے کی تیاریاں مکمل

اسلام آباد : پاکستان میں گوگل کروم بکس بنانے کی تیاریاں مکمل کرلی گئیں ، جس سے پانچ سو افراد کو روزگار کے مواقع ملیں گے۔
تفصیلات کے مطابق پاکستان میں پہلی بار گوگل کروم بکس کی مقامی تیاری کی راہ ہموار ہو گئی ہے۔ کروم بکس نیشنل ریڈیو ٹیلی کمیونیکیشن فیکٹری (این آر ٹی سی) ہری پور میں تیار کی جائیں گی۔
ذرائع نے بتایا کہ گیجٹس کی تیاری کے لیے فیکٹری میں جدید اسمبلی لائن نصب کر دی گئی ہے، یہ منصوبہ ٹیکنالوجی کمپنی ٹیک ویلی پاکستان اور گوگل کے اشتراک سے شروع کیا گیا ہے، جبکہ اسے اسپیشل انویسٹمنٹ فسیلیٹیشن کونسل (SIFC) کے تعاون سے ممکن بنایا گیا۔
ٹیک ویلی پاکستان کے سی ای او عمر فاروق نے بتایا کہ فیکٹری میں سالانہ پچاس لاکھ کروم بکس تیار کی جائیں گی، جس سے پانچ سو افراد کو روزگار کے مواقع ملیں گے۔
ان کا کہنا تھا کہ مقامی سطح پر کروم بکس کی تیاری سے قیمتوں میں واضح کمی آئے گی، جس سے ملک میں ڈیجیٹل ٹرانسفارمیشن کے عمل کو فروغ ملے گا۔