وی پی این سروسز کے حصول کا نیا طریقہ

اسلام آباد : وی پی این سروسز کے حصول کا نیا طریقہ سامنے آگیا ، اس حوالے سے پی ٹی اے نے صارفین کے لیے نئی ہدایات جاری کردیں۔
تفصیلات کے مطابق پاکستان ٹیلی کمیونیکیشن اتھارٹی (پی ٹی اے) نے وی پی این سروسز کے حصول سے متعلق نئی ہدایات جاری کردیں۔
جس کے تحت اب صارفین براہِ راست لائسنس یافتہ وی پی این فراہم کنندگان سے خدمات حاصل کر سکیں گے، جبکہ وی پی این رجسٹریشن کے لیے پی ٹی اے سے رابطہ کرنے کی ضرورت نہیں ہوگی۔
پی ٹی اے نے بتایا کہ وی پی این سروس فراہم کرنے والی کمپنیوں کو کلاس ویلیو ایڈڈ سروسز (ڈیٹا) لائسنس کے تحت لائسنس جاری کیے جا رہے ہیں۔ لائسنس یافتہ کمپنیوں میں الفا 3 کیوبک، زیٹا بائٹ، نکسیلیم ٹیک، ویژن ٹیک 360 اور یو کے آئی کونیِک سولیوشنز شامل ہیں۔
اتھارٹی کا کہنا ہے کہ یہ اقدام صارفین کی سہولت اور ڈیجیٹل سکیورٹی میں بہتری کے لیے کیا گیا ہے۔
پی ٹی اے کے مطابق لائسنس یافتہ وی پی اینز صرف جائز اور قانونی مقاصد کے لیے استعمال کیے جا سکیں گے، جب کہ غیر رجسٹرڈ وی پی اینز کے استعمال سے سائبر خطرات میں اضافہ ہوسکتا ہے۔
پی ٹی اے نے مزید کہا کہ نئے نظام سے قومی سائبر سکیورٹی مضبوط ہوگی اور ملک میں ایک شفاف و محفوظ ڈیجیٹل ماحول تشکیل پائے گا۔