ٹیکنالوجی: میٹا نے واٹس ایپ کے اسٹیٹس اپ ڈیٹس کے لیے ایک نیا میوزک فیچر متعارف کرانا شروع کردیا ہے، جس کے ذریعے صارفین اپنے پسندیدہ گانے محفوظ کرکے بعد میں آسانی سے دوبارہ استعمال کرسکیں گے۔
نئے فیچر کے تحت صارفین واٹس ایپ کے میوزک کیٹلاگ میں موجود گانوں کو اسٹار کرکے محفوظ کرسکیں گے۔ یہ سہولت بالخصوص ان صارفین کے لیے مفید ہوگی جو اپنے پسندیدہ گانے بار بار اسٹیٹس میں شامل کرتے ہیں۔
واٹس ایپ نے میوزک کے لیے دورانیہ منتخب کرنے کا آپشن بھی شامل کیا ہے، جس کی مدد سے صارف طے کرسکے گا کہ اسٹیٹس میں گانا کتنی دیر تک چلایا جائے۔
اس کے علاوہ صارفین گانے کا اپنی پسند کا مخصوص حصہ بھی منتخب کرسکیں گے۔ ویو فارم سلیکٹر کو آگے یا پیچھے منتقل کرکے گانے کے مطلوبہ حصے کو اسٹیٹس میں شامل کیا جاسکے گا۔
نئے فیچر کے ذریعے صارفین میٹا کے میوزک کیٹلاگ سے گانے منتخب کرکے انہیں اپنی پسند کے مطابق اسٹیٹس اپ ڈیٹس میں استعمال کرسکیں گے۔
یہ فیچر مرحلہ وار صارفین تک پہنچایا جا رہا ہے، اس لیے ممکن ہے کہ تمام صارفین کو یہ سہولت فوری طور پر دستیاب نہ ہو۔
