نیویارک: وزیراعظم شہباز شریف نے نیویارک میں گیٹس فاؤنڈیشن کے چیئرمین بل گیٹس سے ملاقات کی، جس میں پاکستان میں پولیو کے خاتمے، ماں اور بچے کی صحت، غذائیت، حفاظتی ٹیکہ جات، ڈیجیٹلائزیشن اور مالیاتی شمولیت سمیت مختلف شعبوں میں تعاون پر تبادلہ خیال کیا گیا۔
ملاقات کے دوران وزیراعظم نے پولیو کے خاتمے کے لیے گیٹس فاؤنڈیشن کی طویل عرصے سے جاری معاونت پر بل گیٹس کا شکریہ ادا کرتے ہوئے پاکستان کے دورے کی دعوت بھی دی۔
دونوں رہنماؤں نے بہتر بیجوں کی تیاری، مویشیوں کی جینیاتی بہتری اور جدید زرعی ٹیکنالوجی کے فروغ سمیت مختلف شعبوں میں تعاون کے امکانات تلاش کرنے پر اتفاق کیا۔
وزیراعظم نے پاکستان سے پولیو کے مکمل خاتمے کے عزم کا اعادہ کرتے ہوئے کہا کہ حکومت صحت عامہ، زراعت، ڈیجیٹل جدت اور مصنوعی ذہانت سمیت مختلف شعبوں میں تعاون کو مزید وسعت دینے میں دلچسپی رکھتی ہے۔
بل گیٹس نے پاکستان میں پولیو کے خاتمے کے لیے جاری کوششوں کو سراہتے ہوئے آئندہ نسلوں کو اس بیماری سے محفوظ رکھنے کے لیے پولیو کا مکمل خاتمہ اہم قرار دیا۔ انہوں نے ملک بھر میں پولیو ویکسینیشن پروگرام کے لیے وزیراعظم کی رہنمائی کو بھی سراہا۔
ملاقات میں وزیراعظم نے بل گیٹس کو زرعی شعبے میں حکومت کی اصلاحات سے آگاہ کیا، جن میں جدت، بایوٹیکنالوجی، موسمیاتی تبدیلی سے مطابقت، تحقیق اور کسانوں کی استعداد کار میں اضافے پر توجہ شامل ہے۔
