نیویارک: امریکی صدر ڈونلڈ ٹرمپ کی اقوام متحدہ کے جنرل اسمبلی اجلاس میں شرکت کے لیے آمد کے موقع پر ایک صحافی نے گزشتہ سال پیش آنے والے اسکیلیٹر کے واقعے کا حوالہ دیتے ہوئے ان پر طنز کیا۔
منگل کے روز اقوام متحدہ کے ہیڈکوارٹر پہنچنے پر صدر ٹرمپ جب اسکیلیٹر پر سوار ہونے لگے تو میڈیا کے ہجوم میں موجود ایک خاتون صحافی نے بلند آواز میں انہیں مخاطب کرتے ہوئے کہا، ’’سیڑھیوں سے ذرا محتاط رہیے گا۔‘‘ اس جملے پر وہاں موجود افراد میں ہلکی سی ہنسی بھی سنائی دی۔
واضح رہے کہ گزشتہ سال اقوام متحدہ آمد کے دوران ڈونلڈ ٹرمپ اور ان کی اہلیہ میلانیا ٹرمپ کے اسکیلیٹر پر سوار ہوتے ہی وہ اچانک رک گیا تھا، جس کے بعد دونوں نے باقی راستہ پیدل طے کیا تھا۔
اس واقعے کے بعد صدر ٹرمپ نے اسے ایک ’’خفیہ اور سازشی واقعہ‘‘ قرار دیتے ہوئے تحقیقات کا مطالبہ کیا تھا۔ تاہم اقوام متحدہ کے ترجمان نے بعد میں وضاحت کی تھی کہ اسکیلیٹر کے رکنے کی وجہ صدر ٹرمپ کے اپنے ویڈیو گرافر کی موجودگی بنی تھی۔
