نیویارک: ایرانی وزارت خارجہ کے ترجمان اسماعیل بقائی نے کہا ہے کہ ایران اور امریکا کے درمیان رابطہ قطری ثالث کے ذریعے ہوا، جس میں تہران نے جنگ کے خاتمے سے متعلق اپنی شرائط واشنگٹن تک پہنچا دی ہیں۔
اسماعیل بقائی کے مطابق ایرانی شرائط میں تمام محاذوں پر جنگ کا خاتمہ، امریکی فوجی کارروائیوں کا رکنا، بحری ناکابندی اور اقتصادی جنگ کا خاتمہ شامل ہے، جبکہ منجمد ایرانی اثاثوں کی بحالی بھی ان شرائط کا حصہ ہے۔
ایرانی ترجمان نے مزید بتایا کہ امریکی صدر ڈونلڈ ٹرمپ کی اقوام متحدہ کی جنرل اسمبلی سے تقریر کے دوران ایرانی وفد نے اجلاس سے واک آؤٹ کیا۔ دوسری جانب ایرانی وزیر خارجہ عباس عراقچی نے جنرل اسمبلی کے موقع پر مختلف ممالک کے حکام سے متعدد دوطرفہ ملاقاتیں کیں۔
اسماعیل بقائی کا کہنا تھا کہ امریکا سے ایرانی وفد کے لیے کسی خصوصی حفاظتی اقدامات کی درخواست نہیں کی گئی۔ ادھر امریکی خصوصی ایلچی اسٹیو وٹکوف نے بھی تصدیق کی ہے کہ نیویارک میں امریکی اور ایرانی وفود کے درمیان ثالثوں کے ذریعے طویل بات چیت ہوئی۔
