کراچی: کے الیکٹرک کے بڑے بجلی بریک ڈاؤن کے باعث کراچی کے پپری پمپنگ اسٹیشن سے شہر کے مختلف علاقوں کو پانی کی فراہمی عارضی طور پر متاثر ہوگئی۔
واٹر کارپوریشن کے ترجمان کے مطابق پپری پمپنگ اسٹیشن کو بجلی کی فراہمی مکمل طور پر منقطع ہونے کے باعث پانی کی سپلائی معطل ہوئی۔ ترجمان کا کہنا ہے کہ کے الیکٹرک کی جانب سے بجلی بحال ہوتے ہی پانی کی فراہمی بھی فوری طور پر بحال کردی جائے گی۔
واٹر کارپوریشن کے مطابق تھرڈ فیز، فورتھ فیز اور کے تھری پمپس ہاؤس کے ایک فیڈر کی بجلی بحال کردی گئی ہے، جبکہ کے تھری پمپس ہاؤس کے دوسرے فیڈر کی بحالی کے لیے کے الیکٹرک کی جانب سے اقدامات جاری ہیں۔
بجلی کی بحالی کے بعد متاثرہ 10 پمپس میں سے 8 کو فعال کردیا گیا، جس کے نتیجے میں پانی کی فراہمی بحال ہونا شروع ہوگئی۔ بجلی کے بریک ڈاؤن کے باعث کراچی کو مجموعی طور پر 198 ملین گیلن پانی کی کمی کا سامنا کرنا پڑا۔
واضح رہے کہ گزشتہ ہفتے بھی دھابیجی پمپنگ اسٹیشن کی بجلی طویل تعطل کے بعد بحال کی گئی تھی، جس کے باعث کراچی میں پانی کی فراہمی متاثر ہوئی تھی۔
