اسلام آباد: وفاقی وزیر اطلاعات عطا تارڑ نے کہا ہے کہ حکومت کسی بھی صورت پی ٹی آئی کو اسلام آباد آکر امن و امان کی صورتحال خراب کرنے کی اجازت نہیں دے گی اور قانون کی عمل داری یقینی بنائی جائے گی۔
نجی ٹی وی سے گفتگو کرتے ہوئے عطا تارڑ نے کہا کہ حکومت اسلام آباد میں امن و امان برقرار رکھنے کے لیے بھرپور اقدامات کرے گی۔ ان کا کہنا تھا کہ پی ٹی آئی نے ماضی میں پرامن احتجاج کا طرزِ عمل اختیار نہیں کیا، اس لیے اسے احتجاج کے دوران قانون کی خلاف ورزی سے گریز کرنا چاہیے۔
وفاقی وزیر اطلاعات نے عمران خان کی بہنوں کی گرفتاری کے حوالے سے کہا کہ انہیں ایسی اطلاعات کی بنیاد پر گرفتار کیا گیا جن کے مطابق امن و امان متاثر ہونے کا خدشہ تھا۔ اس معاملے میں عدالتی و انتظامی کارروائی بھی جاری ہے۔
مذاکرات سے متعلق عطا تارڑ نے پی ٹی آئی کی قیادت اور فیصلہ سازی کے طریقہ کار پر سوالات اٹھاتے ہوئے کہا کہ حکومت کو یہ واضح نہیں کہ مذاکرات کے لیے پارٹی میں حتمی فیصلہ ساز کون ہے۔ انہوں نے بیرسٹر گوہر کے کردار پر بھی تنقید کی اور مذاکرات کی افادیت پر اپنے تحفظات کا اظہار کیا۔
