اسلام آباد: پاکستان اور بھارت کے درمیان جوہری تنصیبات اور سہولتوں کی فہرستوں کا سالانہ تبادلہ کر لیا گیا ہے۔ یہ تبادلہ دونوں ممالک کے درمیان طے شدہ معاہدے کے تحت یکم جنوری کو کیا گیا۔
ہفتہ وار پریس بریفنگ کے دوران ترجمان دفتر خارجہ طاہر حسین اندرابی نے بتایا کہ نئے سال کے آغاز پر پاکستان اور بھارت کے درمیان قیدیوں کی فہرستوں کا تبادلہ بھی عمل میں آیا۔ پاکستان کی جانب سے 257 بھارتی قیدیوں کی فہرست بھارتی حکام کے حوالے کی گئی، جبکہ بھارتی وزارت خارجہ نے اپنی فہرست نئی دہلی میں پاکستانی ہائی کمیشن کے نمائندے کو فراہم کی۔
ترجمان کے مطابق یکم جنوری کو دونوں ممالک نے جوہری تنصیبات اور سہولتوں کی فہرستیں بھی ایک دوسرے کے ساتھ شیئر کیں۔ سفارتی ذرائع کا کہنا ہے کہ جوہری تنصیبات سے متعلق اس معاہدے پر پاکستان اور بھارت نے 31 دسمبر 1988 کو دستخط کیے تھے۔
معاہدے کے تحت دونوں ممالک ہر سال یکم جنوری کو اپنی جوہری تنصیبات اور سہولتوں کی فہرستوں کا باقاعدہ تبادلہ کرتے ہیں، جس کا مقصد اعتماد سازی اور جوہری تحفظ کو یقینی بنانا ہے۔
