سوئٹزرلینڈ کے مشہور لگژری اسکی ریزورٹ کرانس مونٹانا میں واقع ایک بار میں ہونے والے زوردار دھماکے کے نتیجے میں ہلاک افراد کی تعداد 40 ہو گئی ہے، جبکہ تقریباً 100 افراد زخمی ہوئے ہیں، جن میں سے اکثر کی حالت تشویشناک بتائی جا رہی ہے۔
غیر ملکی میڈیا رپورٹس کے مطابق سوئس پولیس کا کہنا ہے کہ کرانس مونٹانا کے اسکی ریزورٹ میں واقع بار میں دھماکے کے فوراً بعد آگ بھڑک اٹھی، جس نے بار کو اپنی لپیٹ میں لے لیا۔ دھماکے کے وقت بار میں نیو ایئر نائٹ منانے والے افراد کی بڑی تعداد موجود تھی۔
سوئس پولیس حکام نے ابتدا میں ہلاکتوں اور زخمیوں کی تعداد یا دھماکے کی وجوہات کے بارے میں تفصیلات فراہم نہیں کیں، تاہم بعد ازاں اطالوی وزارت خارجہ نے تصدیق کی کہ سوئس پولیس کے مطابق دھماکے میں تقریباً 40 افراد ہلاک ہو چکے ہیں۔
سوئس پولیس کمشنر کے مطابق بار میں لگنے والی آگ کے باعث تقریباً 100 افراد زخمی ہوئے ہیں، جن میں سے متعدد شدید زخمی ہیں۔ حکام کا کہنا ہے کہ متاثرین میں کچھ غیر ملکی شہری بھی شامل ہیں۔
پولیس کے مطابق یہ واقعہ بدھ اور جمعرات کی درمیانی شب ایک بج کر 30 منٹ پر پیش آیا۔ سوئس حکام نے واضح کیا ہے کہ اس واقعے کو دہشت گرد حملہ قرار نہیں دیا جا رہا، جبکہ دھماکے کی وجوہات جاننے کے لیے تحقیقات جاری ہیں۔
