گیمبیا میں تارکینِ وطن کی کشتی حادثے کا شکار، 7 افراد جاں بحق، 96 کو بچا لیا گیا
گیمبیا کے شمال مغربی علاقے میں تارکینِ وطن کو لے جانے والی ایک کشتی حادثے کا شکار ہو گئی، جس کے نتیجے میں 7 افراد جان سے ہاتھ دھو بیٹھے، جبکہ 96 افراد کو زندہ بچا لیا گیا۔ غیر ملکی ذرائع ابلاغ کے مطابق بدقسمت کشتی میں ممکنہ طور پر 200 سے زائد تارکینِ وطن سوار تھے۔
گیمبیا کے محکمہ دفاع نے تصدیق کی ہے کہ حادثے کے بعد لاپتہ افراد کی تلاش اور بازیابی کا عمل جاری ہے۔ رپورٹس کے مطابق یہ واقعہ دنیا کے خطرناک ترین مہاجر راستوں میں سے ایک پر پیش آیا، جہاں زیادہ تر مغربی افریقی شہری اسپین پہنچنے کے لیے کنری جزائر کے راستے سفر کرتے ہیں۔
محکمہ دفاع کے بیان کے مطابق کشتی آدھی رات کے قریب نارتھ بینک ریجن کے ایک گاؤں کے قریب حادثے کا شکار ہوئی اور بعد ازاں ایک ریت کے ٹیلے پر پھنسی ہوئی پائی گئی۔
ریسکیو آپریشن میں تین نیول اسپیڈ بوٹس، ایک ساحلی گشت کی کشتی اور ایک مقامی ماہی گیری کی کشتی نے حصہ لیا، جن کے آپریٹرز نے رضاکارانہ طور پر امدادی کارروائیوں میں مدد فراہم کی۔
