کوہاٹ: خیبرپختونخوا کے ضلع کوہاٹ میں تیل اور گیس کا ایک نیا ذخیرہ دریافت کر لیا گیا ہے، جسے توانائی کے شعبے میں ایک اہم پیش رفت قرار دیا جا رہا ہے۔
آئل اینڈ گیس ڈیولپمنٹ کمپنی لمیٹڈ کے مطابق یہ دریافت کوہاٹ کے نشپا بلاک میں واقع برگزئی ایکس او ون نامی کنوئیں سے ہوئی ہے۔ کمپنی کا کہنا ہے کہ ابتدائی پیداواری ٹیسٹ کامیاب رہے ہیں۔
او جی ڈی سی ایل کے مطابق ابتدائی نتائج کی بنیاد پر اس کنویں سے یومیہ تقریباً 4100 بیرل خام تیل حاصل ہونے کی توقع ہے، جبکہ اس کے ساتھ یومیہ 10.5 ملین اسٹینڈرڈ کیوبک فٹ گیس بھی پیدا ہوگی۔
حکام کے مطابق یہ دریافت ملکی توانائی کی ضروریات پوری کرنے میں معاون ثابت ہوگی اور تیل و گیس کی درآمدات پر انحصار کم کرنے میں مدد دے گی۔ کنویں سے تجارتی پیداوار کے لیے مزید تکنیکی مراحل مکمل کیے جا رہے ہیں۔
