اسلام آباد: محکمہ موسمیات نے ملک کے بیشتر علاقوں میں بارشوں اور برفباری کا امکان ظاہر کر دیا ہے، جس سے موسم میں نمایاں تبدیلی متوقع ہے۔
محکمہ موسمیات کے مطابق لاہور میں موسم ایک بار پھر تبدیلی کی جانب گامزن ہے۔ 31 دسمبر سے یکم جنوری کے دوران شہر میں تیز ہواؤں اور گرج چمک کے ساتھ بارش کا امکان ہے۔ واضح رہے کہ لاہور اس وقت دنیا کے آلودہ ترین شہروں میں چھٹے نمبر پر ہے، جہاں ایئر کوالٹی انڈیکس 179 ریکارڈ کیا گیا۔ ماہرین کا کہنا ہے کہ متوقع بارشوں سے فضائی آلودگی اور اسموگ میں واضح کمی آنے کی امید ہے۔
محکمہ موسمیات کا کہنا ہے کہ کراچی میں موسم سرما کی پہلی بارش 30 دسمبر کو ہو سکتی ہے۔ منگل سے بدھ کے درمیان مغربی ہواؤں کا سسٹم شہر پر اثر انداز ہونے کا امکان ہے، جس کے بعد سردی میں اضافے کی توقع ہے۔
دوسری جانب بلوچستان میں 29 دسمبر سے یکم جنوری تک بارش، آندھی اور گرج چمک کے ساتھ برفباری کا امکان ظاہر کیا گیا ہے، جس کے باعث درجہ حرارت میں نمایاں کمی آ سکتی ہے۔
محکمہ موسمیات کے بیان کے مطابق 30 دسمبر اور یکم جنوری کے دوران چترال، دیر، سوات، شانگلہ، کوہستان، بٹگرام، مانسہرہ، ایبٹ آباد، ہری پور، بونیر، باجوڑ، مہمند، خیبر، اورکزئی، کرم، وزیرستان، پشاور، چارسدہ، نوشہرہ، صوابی، بنوں، کرک، ڈیرہ اسماعیل خان، ٹانک اور کوہاٹ میں وقفے وقفے سے تیز ہواؤں اور گرج چمک کے ساتھ بارش کا امکان ہے، جبکہ بالائی علاقوں میں درمیانی سے شدید برفباری کی بھی توقع ہے۔
ادھر گلگت بلتستان کے بالائی علاقوں میں شدید سردی کے باعث پانی جم گیا ہے، تاہم محکمہ موسمیات نے ان علاقوں میں بارش اور ہلکی برفباری کی نوید بھی سنا دی ہے۔ محکمہ موسمیات نے شہریوں کو احتیاطی تدابیر اختیار کرنے کی ہدایت کی ہے۔
