اسلام آباد: یومِ استحصالِ کشمیر کے موقع پر صدر مملکت آصف علی زرداری، وزیراعظم شہباز شریف اور نائب وزیراعظم و وزیر خارجہ اسحاق ڈار نے کشمیری عوام کے ساتھ مکمل یکجہتی کا اظہار کرتے ہوئے بھارت سے 5 اگست 2019 کے اقدامات واپس لینے کا مطالبہ کیا ہے۔
صدر مملکت آصف علی زرداری نے اپنے پیغام میں کہا کہ 5 اگست کشمیری عوام کے ساتھ یکجہتی کے اظہار کا دن ہے۔ انہوں نے کشمیری عوام کی جدوجہد، بہادری اور استقامت کو خراجِ تحسین پیش کرتے ہوئے کہا کہ 2019 میں کیے گئے بھارتی اقدامات عالمی قوانین اور اقوام متحدہ کی سلامتی کونسل کی قراردادوں کے منافی تھے۔
صدر مملکت کا کہنا تھا کہ بھارت کے اقدامات جموں و کشمیر کی متنازع حیثیت کو تبدیل نہیں کر سکتے، جبکہ پاکستان کشمیری عوام کی اخلاقی، سیاسی اور سفارتی حمایت جاری رکھے گا۔
وزیراعظم شہباز شریف نے اپنے پیغام میں کہا کہ 5 اگست 2019 کے اقدامات کے بعد مقبوضہ کشمیر میں ریاستی جبر میں اضافہ ہوا اور بنیادی آزادیوں کو محدود کیا گیا۔ انہوں نے عالمی برادری پر زور دیا کہ وہ مسئلہ کشمیر کے منصفانہ اور دیرپا حل کے لیے مؤثر کردار ادا کرے۔
نائب وزیراعظم و وزیر خارجہ اسحاق ڈار نے بھی یومِ استحصالِ کشمیر پر کشمیری عوام کے ساتھ پاکستان کی حمایت جاری رکھنے کے عزم کا اعادہ کیا۔ ان کا کہنا تھا کہ 5 اگست 2019 کے اقدامات نے خطے میں امن کی کوششوں کو متاثر کیا، جبکہ کشمیری عوام کے حقِ خودارادیت کا احترام عالمی قوانین کا تقاضا ہے۔
