کے کے آر کے کھلاڑی رنکو سنگھ کو مبینہ طور پر انڈرورلڈ کی جانب سے دھمکیاں موصول

نئی دہلی(10 اکتوبر 2025): بھارتی قومی کرکٹ ٹیم کے بیٹسمین اور آئی پی ایل میں کولکتہ نائٹ رائیڈرز (کے کے آر) کے کھلاڑی رنکو سنگھ کو مبینہ طور پر انڈرورلڈ کی جانب سے دھمکیاں موصول ہوئی ہیں۔
بھارتی میڈیا کے مطابق کھلاڑی رنکو سنگھ سے 5 کروڑ روپے کا مطالبہ کیا گیا ہے۔ نڈرورلڈ سے منسلک ایک شخص فروری 2025 سے رنکو سنگھ کو پیغامات بھیج رہا ہے۔
بھارتی میڈیا کا کہنا ہے کہ ابتدا میں یہ پیغامات مالی مدد کے لیے ایک شائستہ درخواست کی شکل میں تھے، لیکن اب یہ سنگین بھتہ خوری کی دھمکیوں میں تبدیل ہو چکے ہیں، جن کا تعلق انڈرورلڈ سے ہے۔
اس حوالے سے بھارتی پولیس نے 2 افراد کو گرفتار بھی کیا ہے، جن کے نام دلشاد اور نوید ہیں، دونوں ویسٹ انڈیز میں روپوش تھے جنھیں یکم اگست کو بھارتی حکام کے حوالے کیا گیا۔
نوید نے ابتدا میں رنکو سے ایک مداح کے طور پر رابطہ کیا، ان کی کارکردگی اور میدان میں ان کی محنت کی تعریف کی اور شائستگی سے مالی مدد مانگی، چند دنوں کے اندر نوید کے پیغامات زیادہ براہ راست اور جارحانہ ہو گئے۔
9 اپریل تک اس نے رنکو سے 5 کروڑ روپے کا مطالبہ کیا اور کہا کہ وہ رقم وصول کرنے کا وقت اور جگہ طے کرے گا، جب رنکو نے کوئی جواب نہیں دیا تو نوید نے کرکٹر کو سنگین دھمکی دی۔
20 اپریل کو، اس نے بدنام زمانہ جرائم پیشہ تنظیم ڈی-کمپنی کا ذکر کرتے ہوئے آخری پیغام بھیجا، جو صرف یہ تھا”یاد دہانی! ڈی-کمپنی۔”
واضح رہے کہ ڈی-کمپنی ایک جرائم پیشہ گروہ ہے، جسے بھارت کے مطلوب ترین مجرم نے قائم کیا تھا، یہ گروہ منشیات کی اسمگلنگ، بھتہ خوری، اغوا، ٹارگٹ کلنگ اور انڈرورلڈ سرگرمیوں میں ملوث ہے۔
دوران تفتیش ان میں سے ایک ملزم نے ذاتی طور پر رنکو سنگھ کو فون کرکے بھتہ طلب کرنے کا اعتراف کیا ہے۔