اسلام آباد : ٹیکنالوجی کمپنی گوگل نے 18 سال یا اس سے زائد عمر کے پاکستانی طلباء کو اے آئی پرو پلان مفت دینے کا اعلان کردیا۔
تفصیلات کے مطابق ٹیکنالوجی کمپنی گوگل نے پاکستانی طلباء کے لیے بڑا اعلان کرتے ہوئے مفت “گوگل اے آئی پرو پلان” فراہم کرنے کا فیصلہ کیا ہے، یہ سہولت 18 سال یا اس سے زائد عمر کے طلباء کے لیے دستیاب ہوگی۔
گوگل نے کہا کہ یہ پیشکش ایک سال کے لیے بلا معاوضہ سبسکرپشن پر مشتمل ہوگی، جس کا مقصد تعلیم، تحقیق اور تخلیقی صلاحیتوں کو فروغ دینا ہے۔
اس پروگرام کے تحت طلباء کو جدید اے آئی ٹولز اور فیچرز تک رسائی حاصل ہوگی، جن میں جیمنائی 2.5 پرو ماڈل کے ذریعے ڈیپ ریسرچ اور جدید خصوصیات شامل ہیں۔
گوگل نے بتایا کہ طلباء کو جی میل، ڈاکس، شیٹس، سلائیڈز اور میٹ میں اے آئی معاونت فراہم کی جائے گی، جس سے وہ ای میلز کا خلاصہ، پریزنٹیشنز اور ڈیٹا تجزیہ زیادہ مؤثر انداز میں کر سکیں گے۔
مزید بتایا گیا ہے کہ نوٹ بُک ایل ایم طلباء کو ذاتی نوعیت کی تحقیق اور تحریر میں مدد فراہم کرے گا، جبکہ ویڈیو اور تصاویر سے تخلیقی مواد تیار کرنے کے جدید ٹولز بھی دستیاب ہوں گے۔
گوگل کے مطابق، جیمنائی میں Veo 3 اور Flow جیسے جدید فیچرز شامل ہیں، جب کہ ہر طالب علم کو 2 ٹی بی کلاؤڈ اسٹوریج بھی مفت فراہم کی جائے گی تاکہ فائلز، نوٹس اور پراجیکٹس محفوظ رکھے جا سکیں۔
گوگل کا کہنا ہے کہ “ہر طالب علم کو جدید اے آئی ٹولز تک رسائی دینا ہمارا مشن ہے، یہ پروگرام پاکستان سمیت ایشیا پیسفک کے متعدد ممالک میں شروع کیا جا رہا ہے۔
