کراچی: بلدیہ عظمیٰ کراچی نے شہر میں ٹینکرز اور ہائیڈرنٹس کے ذریعے پانی کی فراہمی ختم کرنے کا فیصلہ کر لیا ہے۔ میئر کراچی مرتضیٰ وہاب نے واٹر کارپوریشن کے اعلیٰ حکام کو متبادل نظام متعارف کرانے کی ہدایت جاری کردی ہے۔
مرتضیٰ وہاب نے کہا کہ شہر میں قائم تمام سات ہائیڈرنٹس کو مرحلہ وار ختم کیا جائے گا اور پانی کی فراہمی پائپ لائنوں کے ذریعے یقینی بنائی جائے گی تاکہ شہریوں کو ان کی دہلیز پر پانی دستیاب ہوسکے۔ ان کا کہنا تھا کہ واٹر ہائیڈرنٹس سے ماہانہ تقریباً 30 کروڑ روپے کا ریونیو حاصل ہوتا ہے تاہم ان کے کنٹریکٹس گزشتہ سال ختم ہوچکے ہیں اور اب نئے کنٹریکٹس جاری نہیں کیے جائیں گے۔ میئر کراچی کے مطابق شہریوں کو ٹینکر مافیا سے نجات دلانا اولین ترجیح ہے۔
مرتضیٰ وہاب نے مزید بتایا کہ شہر میں پانی کی قلت کے حل کے لیے متبادل دنوں میں مختلف علاقوں کو پانی فراہم کیا جائے گا۔ ان کے مطابق ٹینکرز کے ذریعے پانی کی فراہمی کوئی مستقل حل نہیں اور اس نظام سے شہریوں کو شدید مشکلات کا سامنا کرنا پڑتا ہے۔
