اسلام آباد: وفاقی وزیرِ داخلہ محسن نقوی نے متحدہ عرب امارات کے وفد سے ملاقات میں مسافروں کے لیے امیگریشن کے عمل کو مزید سہل بنانے سے متعلق اہم پیش رفت کا اعلان کیا۔ وفد کی قیادت ڈائریکٹر جنرل کسٹمز و پورٹ سیکیورٹی
احمد بن لاحج الفلاسی کر رہے تھے۔
ملاقات کے دوران پاک۔یو اے ای تعلقات، دوطرفہ تعاون اور مسافروں کی سہولت کے لیے امیگریشن نظام بہتر بنانے پر تفصیلی تبادلہ خیال کیا گیا۔ فریقین نے ’پری امیگریشن کلیئرنس‘ کے حوالے سے باضابطہ معاہدہ کرنے پر اتفاق کیا، جس کا آغاز ابتدائی طور پر پائلٹ بنیادوں پر ہوگا اور پہلا مرحلہ کراچی سے شروع کیا جائے گا۔
وفاقی وزیر داخلہ محسن نقوی کے مطابق نئے نظام کے تحت مسافروں کی امیگریشن اور دیگر متعلقہ کلیئرنس پاکستان ہی میں مکمل ہوگی۔ اس اقدام سے متحدہ عرب امارات پہنچنے پر مسافروں کو طویل امیگریشن کارروائی سے گزرنے کی ضرورت نہیں رہے گی اور وہ ڈومیسٹک مسافروں کی طرح سیدھا ایئرپورٹ سے باہر جاسکیں گے۔
محسن نقوی نے کہا کہ اس نظام کے نفاذ سے سفر میں سہولت، وقت کی بچت اور مسافروں کے مجموعی تجربے میں نمایاں بہتری آئے گی۔ یو اے ای وفد نے اس منصوبے کو دونوں ممالک کے عوام کے لیے فائدہ مند قرار دیتے ہوئے مکمل تعاون کی یقین دہانی کرائی۔
