ایران ایئر نے مشہد، زاہدان، کوئٹہ پروازوں کا آغاز کر دیا

کراچی: پاکستان ایئرپورٹس اتھارٹی کا کہنا ہے کہ ایران ایئر نے مشہد، زاہدان، کوئٹہ پروازوں کا آغاز کردیا ہے، ایران ایئر کی فلائٹ 826 گزشتہ رات کوئٹہ پہنچی۔
پاکستان ایئرپورٹس اتھارٹی کے مطابق گورنر بلوچستان جعفر خان مندوخیل نے افتتاحی تقریب میں شرکت کی، ایرانی کونسل جنرل بھی اس موقع پر موجود تھے۔
بیان میں کہا گیا ہے کہ ایران ایئر کی پہلی پرواز کو واٹر کینن سے سلامی دیکر خیرمقدم کیا گیا، ایران ایئر کی ہفتہ وار پرواز ہر بدھ رات ساڑے 9 بجے کوئٹہ پہنچے گی۔
اس سے قبل ایئر لائن نے مشہد سے لاہور کے درمیان پرواز کے آغاز کا اعلان کیا تھا، ایران ایئر لاہور کے لیے ہفتہ وار ایک پرواز آپریٹ کرے گی، پروازوں کا باقاعدہ آغاز 29 اکتوبر سے کردیا گیا ہے۔

عراق جانے والے زائرین کیلئے اہم خبر آگئی، عراقی حکام نے مقدس مذہبی مقامات پر زائرین کے لیے نئے ضوابط متعارف کرائے ہیں۔
عراقی حکام کے مطابق عراق میں مقدس مقامات کی زیارات کے لیے عمرکی حد مقرر کردی گئی ہے، ہدایات کے مطابق 50 سال سے کم عمر اکیلے مردوں کو زیارت کے لیے ویزا جاری نہیں ہوگا، 50 سال سے کم عمر مرد کو فیملی کے ہمراہ درخواست دینے پر ویزا جاری کیا جائے گا۔
عراقی حکام نے زور دیا کہ یہ فیصلہ مذہبی آزادی کو محدود کرنے کے لیے نہیں بلکہ ہر سال خصوصاً بڑے مذہبی مواقع پر آنے والے لاکھوں زائرین کے لیے سیکیورٹی، تحفظ اور لاجسٹک انتظامات کو بہتر بنانے کے لیے کیا گیا ہے۔
یہ نئے قوانین عراق کے مقدس مزارات اور مقدس شہروں کے زیارت کے مقصد سے داخلے کے خواہشمند تمام غیر ملکی درخواست دہندگان پر لاگو ہوں گے۔
عراقی حکام نے سفری گروپ کو مشورہ دیا ہے کہ وہ ویزا کے لیے درخواست دینے سے پہلے تازہ شرائط کا بغور جائزہ لیں، یہ اعلان عراق کی زیارتی پالیسیوں میں ایک اہم تبدیلی کو ظاہر کرتا ہے اور اس کے ممکنہ زائرین پر نمایاں اثرات مرتب ہونے کی توقع ہے۔