علیمہ خان کے بینک اکاؤنٹس منجمد کرنے کے لیے تمام بینکوں کو سرکلر جاری

راولپنڈی : اسٹیٹ بینک نے علیمہ خان کے بینک اکاؤنٹس منجمد کرنے کے لیے تمام بینکوں کو سرکلر جاری کر دیا۔
تفصیلات کے مطابق راولپنڈی کی انسدادِ دہشتگردی عدالت میں 26 نومبر کے احتجاج سے متعلق کیس کی سماعت ہوئی، جس میں اسٹیٹ بینک، نادرا اور پاسپورٹ امیگریشن حکام نے اپنی رپورٹس جمع کرادیں۔
رپورٹ میں بتایا گیا نادرا اور پاسپورٹ امیگریشن نے علیمہ خانم کا شناختی کارڈ اور پاسپورٹ بلاک کر دیا ہے، جب کہ اسٹیٹ بینک نے ان کے بینک اکاؤنٹس منجمد کرنے کے لیے تمام بینکوں کو سرکلر جاری کر دیا ہے۔
عدالتی ریکارڈ میں بتایا گیا کہ علیمہ خان ناقابلِ ضمانت وارنٹ کے باوجود پانچ بار عدالت میں پیش نہیں ہوئیں، عدالت پہلے ہی ان کے ضمانتی مچلکے ضبط کر چکی ہے، جب کہ ضامن کی جائیداد بھی ضبط کرنے کے احکامات دیے جا چکے ہیں۔
یاد رہے تھانہ صادق آباد میں درج مقدمے میں علیمہ خانم سمیت 11 ملزمان کو نامزد کیا گیا ہے۔ ان پر الزام ہے کہ انہوں نے کارکنان کو پرتشدد احتجاج پر اکسانے اور کارِ سرکار میں مداخلت کی ترغیب دی۔
بعد ازاں عدالت نے 26 نومبر کے احتجاج سے متعلق کیس کی مزید سماعت آئندہ تاریخ تک ملتوی کر دی۔