کراچی: وزیرِ تعلیم سندھ سردار شاہ نے اسکولوں کے اوقاتِ کار میں ایک گھنٹے کی کمی کا اعلان کردیا۔
سردار شاہ نے یہ اعلان اپنے آفیشل فیس بک اکاؤنٹ پر جاری کردہ پوسٹ کے ذریعے کیا۔ کراچی میں تقریب سے خطاب کرتے ہوئے انہوں نے کہا کہ صوبے میں یکساں تعلیمی پالیسی بنانا ایک چیلنج رہا ہے، جبکہ بڑی تعداد میں بچوں کا اسکولوں سے باہر ہونا بھی سنگین مسئلہ ہے۔
وزیرِ تعلیم نے بتایا کہ سیلاب کے باعث 20 ہزار اسکولوں کی دیواروں کو نقصان پہنچا۔ ان کا کہنا تھا کہ پاکستان تعلیم پر دنیا کے کم ترین اخراجات کرنے والے ممالک میں شامل ہے، اس لیے وفاقی حکومت کو تعلیمی مراکز کے لیے فنڈز فراہم کرنے چاہئیں۔
